中環出更：林卓鋒嗌錯班主任做媽咪
每個人生命中都有重要嘅引路人，可能係父母、老師或某一位前輩，卓妮早前出席一個領袖導師計劃嘅開幕典禮，獅子山青年商會會長林卓鋒（Jackie）就分享話，自己有一位深受其影響嘅老師，至今仍有聯絡，仲笑言細個仲曾經嗌錯佢做媽咪，老師唔單止冇嬲仲笑笑口。
Jackie話呢位係自己嘅小學老師，可能因為係女老師嘅關係，為人好好，仲要係班主任，經常照顧佢同引導佢，到依家都有保持聯絡o架，由於佢上一年都仲係校董，亦都係舊生會主席，成日都會返去幫手，而老師到依家都喺間學校教緊，Jackie仲話連媽咪同呢位老師關係都好好o架，真係好難得咁話。
國際青年商會香港總會（總會）會長鄭永翔（Maric）同領袖才能發展董事梁慧珊都在場，Maric話自己每個時期都分別有恩師，初中時一位女老師經常支持同鼓勵佢，高中就有一位亦師亦友嘅男老師，令佢大學選擇工業工程系，大學就係畢業作品嘅導師幫助最大，第一份工都係佢介紹添！總會副會長李貝詩就喺入行時，遇到位好似爸爸咁嘅前輩，非常照顧自己，人生中有咩問題都會請教佢，連早兩年佢患癌後都仲會持續問候自己，佢仲話萍水相逢嘅人對自己咁好，實在好難得！
周定宇獲無名老人傳授氣功
卓妮喺另一個場合見到前港隊武術運動員、傑出青年協會主席周定宇同常務副主席陳建強。周定宇話廿年前喺北京體育大學讀書時，每朝喺頤和園附近練跑，見過一位花甲老人面向一棵大松樹練功，某日老人向佢「挑機」，佢自恃年輕力壯同意比試身手，點知對方只係輕鬆一掌，佢就蹌踉後退十幾步，佢於是就拜老人為師，個師傅向佢傾囊相授氣功，歷時四年，令佢受益唔少，但之後師傅突然消失咗，佢到依家都唔知呢位師傅姓甚名誰。
卓妮