政情：李梓敬認紋眉補色網友彈唔自然

講究儀容係不分性別，近年愈嚟愈多人走去紋眉，因為紋咗就可以一勞永逸唔使下下畫眉，睇落亦都乾淨利落兼精神醒目。話說前深水埗區議員李梓敬早前就轉型做YouTuber，頻頻拍片發表自己嘅政見，但有網友發現今個月十號開始，佢喺片入面個樣有啲怪怪哋，就問佢搞邊科啦，原來係去咗紋眉！

李梓敬話，佢老婆兩年前已經叫咗佢去紋眉，話望落會精神啲，不過隔咗一排就會甩色，所以佢幾個星期前就去咗補色，當時嘅效果係頗為深色同唔自然，不過日日要出片根本冇得避，冇可能成個禮拜都唔見人，惟有帶住堂又黑又實嘅眉上鏡喇，好彩依家都算係甩咗啲色，睇落自然啲嘞。

問到佢點睇網友嘅反應，李話支持佢嘅人咪鍾意，唔支持嘅咪唔鍾意囉，所以冇乜特別喎。其實坊間有傳紋眉可以轉運，唔知李除咗想睇落靚仔啲，係咪都想轉吓運呢？

政情：李梓敬認紋眉補色 網友彈唔自然