政情：防疫包小冊子有問題 楊雪盈被轟冇諮詢
好多區議會都撥款向市民派發防疫用品，灣仔區議會尋日開會，邀請循道衛理中心交代一百二十四萬元購買防疫包嘅進度，繼早前十三位議員每位獲發二百四十四份防疫包之後，第二批嘅七千份亦都係上周六到貨，點知有區議員發現防疫包內嘅小冊子有問題，質疑區議會主席楊雪盈喺事前冇作任何諮詢，程序上獨斷獨行，得佢一個人話晒事，搞到大家幫佢執手尾喎。
資訊落伍 字眼甩漏
議員林偉文話喺收到防疫包時先知小冊子係乜嘢樣，仔細睇先發現有問題，例如之前取消喺區內設置消毒裝置，但小冊子仲有呢啲內容冇刪到，病毒名稱仲係武漢肺炎唔係新冠肺炎，質疑主席係未經區議員同意就做，結果有錯，唔通又要大家一齊負責。佢又重申唔係唔派物資，係程序上問題，叫主席做任何事要諮詢各位議員咁話。
另兩名區議員同樣話冇睇過小冊子嘅初步設計，事前亦冇傳閱過，又發現小冊子冇「區議會贊助」字眼，完全係低級錯誤；區議員謝偉俊就話「區議會贊助」字眼都冇，擔心會計部會吹毛求疵，又話依家唔係一個人話晒事，越位兼獨斷獨行搞到依家咁，真係要諗吓點處理喇！擺明係暗寸楊雪盈。
循道衛理中心代表其後就建議用簡單方法，如印製一張新單張，上面交代最新資料、區議會贊助字眼、衞生防護中心電話等，之後再攝入防疫包內補鑊喇，目標係盡快派到畀市民咁話。