政情：工務小組 議程大塞車 唔避炎開會

盧偉國：需要平衡抗疫與審議進度

睇番工務小組今日嘅議程上有五項，包括有關沙田至中環線（沙中線）嘅追加撥款、洪水橋及廈村新發展區嘅相關撥款、香港科學館及香港歷史博物館擴建工程撥款，以及有關香港體育學院新設施大樓同多個土木工程項目嘅研究撥款。五項議程當中，最具爭議性嘅要數排喺首項議程、涉及逾一百億元嘅沙中線追加撥款項目，喺議程大塞車之下，唔少泛民議員早前仍表明會反對相關項目。

盧尋日喺回覆泛民議員嘅信件當中就指出，佢作為工務小組主席，需要平衡抗疫需要同審議進度，又話工務小組自二月開始已有多次會議受疫情影響而需取消，以至會議時間減少。佢亦話今日嘅大會亦已安排舉行會議，無論工務小組今日開唔開會，大樓內都會有好多議員、官員、職員同傳媒，考慮到尚待審核嘅項目同民生相關亦具迫切性，故繼續召開工務小組會議。

查實港鐵針對沙中線項目嘅流動資金已用到所剩無幾，預計最快五月就會因為無晒錢而要停工。盧回覆查詢時就話自己亦陷於兩難，但強調沙中線項目有迫切性，工程唔能夠停擺，而且喺工務小組傾完亦要交上財委會作最終審批，所以決定聽日照開會。佢仲話依家仍有多個項目、涉及近千億嘅工程積壓咗喺工務小組未處理，所以要預多啲時間咁話喎。

財會倘迫切 陳健波：着保護衣都返

另外，財委會亦因應疫情取消咗原定今個星期五舉行嘅會議。主席陳健波話上星期五會議審議進度較預期快，較有迫切性嘅項目已經處理好，加上今個星期嘅疫情真係嚴重咗，所以就決定取消今個星期嘅會議。至於未來會唔會再取消會議？佢就話要因應疫情發展同尚待審核項目嘅迫切性，更笑指若項目迫切嘅話，「着保護衣都要返嚟開會」。佢又提到，若非上星期通過咗西九文化區嘅項目，今個星期仍然會照常開會。