中環出更：親子共樂 王賢訊倡桌遊代手遊
曾幾何時，飛行棋、大富翁等桌上遊戲（桌遊），係每個人成長期間必備之物。仁濟醫院主席王賢訊今日仍然清楚記得，佢年少時玩嘅港版大富翁，最貴嘅地皮係石澳，然而事隔數載，新推出嘅港版大富翁，山頂就變咗係最昂貴嘅地段之餘，就連銀碼都多咗個零，不但令佢深感香港社會變遷之急速，亦隱約體會到銀紙係會縮水呢種金錢觀念。
雖然桌遊具啟發性，係相當益智嘅遊戲活動，但因今日手機遊戲大行其道，相形之下桌遊就似乎變咗小眾玩意。不過王賢訊認為，獨自對住部手機玩樂，始終唔及得大家圍住個棋盤對弈，咁能夠促進人與人之間嘅交流。若果擔心下一代沉溺於虛擬世界的話，咁就更加需要選擇桌遊為親子活動。
王賢訊日前同太太朱穎詩，出席基督教香港信義會社會服務部，接受一間社企送出五百套桌遊嘅捐贈儀式，同場嘅嘉賓仲有港鐵企業傳訊經理朱寶賢，以及香港聖公會麥理浩夫人中心團體及社區工作部部門主任王馥雅。總幹事陳麗群作為受惠機構嘅代表，指大富翁嘅遊戲設定，就係玩家若能把握機會，富者愈富以致勝者全贏，反之一旦落入下風，敗部復活嘅機率甚微。而現實社會又同大富翁遊戲有幾分相似，能夠達到人生勝利組嘅幸運兒實在有限，因此有餘力者，應顧及弱勢社群嘅處境。而信義會今次獲得嘅桌上遊戲，將以低收入家庭為轉贈對象。
黃頌行：網絡難體現溫情
今次送出桌遊嘅社企「樂在棋中」創辦人黃頌行，佢憶述兒時捉象棋搵爸爸做對手，結果畀佢爆冷勝出棋局。不過後來佢先至知道，拙於感情表達嘅爸爸，其實係為討兒子歡心而故意喺棋盤上讓步。佢話呢種充滿溫情嘅對弈，網絡遊戲就恐怕做唔到喇。
卓妮