政情：公民講場：隔離營不足 倡建組合屋 疫情告急 政府咪再齋噏

隨着大批海外人士陸續返港，本港對檢疫設施嘅需求亦急增。面對外界質疑現有隔離設施不足以應付日益俱增嘅檢疫需求，行政會議成員林正財尋日就話，政府正研究喺鯉魚門一帶同迪士尼樂園旁邊興建組裝合成嘅組合屋檢疫中心，以作病房分流用途。查實興建組合屋就好似砌積木咁，只要將預製組件裝嵌就可以好快起好。之不過，政府早喺二月已經話要起組合屋作檢疫用途，至今仍然係只聞樓梯響，睇嚟再快嘅方法去到政府手上都只會係慢半拍。政府懶懶閒唔急，林真係幾心急都冇用喇。