政情：疫監坐到悶 葉劉走去博物館
目前從內地返港人士均需接受隔離檢疫十四日。身兼行政會議成員嘅議員葉劉淑儀（葉劉，圖）因之前去珠海，返港後都要接受家居檢疫坐「疫監」。但佢尋日就話去咗參觀博物館，莫非喺屋企悶得滯，偷走咗去博物館睇展覽？
網上參觀 足不出戶長知識
其實葉劉只係喺屋企上網參觀虛擬博物館。佢話朋友知佢要接受隔離，就介紹佢上網睇歌劇同參觀虛擬博物館。佢瀏覽後都覺得內容十分豐富，配上解說就如置身現場，覺得係非常好嘅解悶良方，仲令人足不出戶都可增長知識，對西九文化區M+博物館都有參考價值。
問到虛擬博物館有咩睇，葉劉話雖然去過唔少知名博物館，但館內經常換主題，所以間中都會上網睇吓有冇新展品，有人會覺得參觀虛擬博物館冇咁迫，但亦都有人鍾意到現場親身體驗。至於坐完「疫監」後會做乜嘢，葉劉就話想剪番個靚髮再返工，女士真係幾時都咁貪靚。