中環出更：盼主憐憫 曾蔭權獄中洗廁所都唸經
前特首曾蔭權爵士任內涉漏報利益，被裁定公職人員行為失當罪成而被判囚二十個月，成為本港首位淪為階下囚嘅特首。佢出獄後鮮有露面，最近佢就接受咗天主教機構「生命恩泉」訪問。佢喺訪問中自爆，喺獄中即使洗廁所同清潔地方嘅時間，都會每分每秒唸住經，以祈求耶穌憐憫。
話要效法聖人
本身係天主教徒嘅曾蔭權爵士喺訪問入面主要都係講信仰，並無提及最近新冠肺炎嘅疫情同現屆政府施政表現。佢話，坐監期間好多朋友都寄啲哲學同宗教書籍畀佢，佢愈睇愈有興趣，不過有好多都唔太明，好彩陳志明神父當時每周都去探佢監，同佢討論信仰問題，又叫佢「一定要學做聖人」，做人先會開心，亦可以同天主更加接近，呢句說話成為咗佢嘅座右銘喎。
佢又話，喺咁細嘅囚房入面，佢喺做柔軟操之外就係讀經，亦會默想一啲聖人事迹。佢話太太試過諗起一個聖人唸經時，就會搵番唔見咗嘅嘢，非常神奇。佢自己都有效法一個聖人，就係將生活上每一件小事都當係為神而做，就算清潔環境同洗廁所，佢都一路洗一路唸經，希望得到天主嘅憐憫喎。
卓妮