中環出更：停課不停學 朱景玄：最怕孩童冇動力
呢排學校都停課，復課之日遙遙無期，不過唔少學校都希望做到停課不停學，所以都搞緊網上學習。新界校長會會長朱景玄早排出席一個活動時講起學生哥在家學習安排，佢就話，畀學生在家透過網上學習有一個大危機，究竟係咩呢？原來佢係擔心學生會冇動力學習喎。
朱景玄話，網上學習旨在唔好畀學生嘅學習動力跌落嚟，事關有啲學生喺停學呢段時間放鬆咗，就好難先有動力推動佢哋再學習，直言呢樣先係最大危機，所以無論公立或私立學校，都好努力去諗方法延續學生學習動力。問到佢自己嘅生活又有冇受停課影響，佢就話都係如常六點鐘起身，之後做半日嘢，如果可以就行吓山、踩吓單車，食飯就通常都喺屋企食，盡量減少外出，佢仲覺得自己比以前fit咗添。
邱少雄：只係變模式 一樣咁忙
當日嘅活動其實係善德基金會嘅一個捐贈兒童口罩儀式，同場仲有新界校長會主席邱少雄，同埋基金會主席董吳玲玲、副主席鄭穩偉同蕭何元鳳、總理鄒圳麗同關劉麗霞。問到停課期間係咪冇咁忙，邱就話原來唔係，皆因只係學習模式改變咗，始終停課不停學，老師都要搵唔同教材作網上教學用。而學校亦要做好衞生準備同評估情況，等復課時學生可以安全返學，所以都好多嘢做o架。
基金會今次活動籌集到十五萬個兒童口罩，董吳玲玲話都用咗一段好長嘅時間籌集，仲要喺唔同地方搜羅，好彩有一眾有心人士幫手。佢又話，大家都知兒童口罩嚴重短缺，有錢都未必買到，令家長好焦慮，擔心復課時兒童冇口罩用，所以就諗住幫得幾多得幾多，等學生返學時可以安心啲。
卓妮