政情：麥美娟寸劉國勳唔識抹車
的士係香港公共交通運輸系統嘅重要組成部分，唔少的士司機就喺疫情持續情況下仍要開工，服務市民，尋日有團體同班的士司機一齊抗疫，包括麥美娟、葛珮帆同劉國勳等多名議員都有到場支持，仲齊齊幫手抹車添！不過，麥美娟就寸劉國勳唔識抹車喎。
塊布黑晒都唔去洗乾淨
喺活動期間，一班議員都落手落腳洗車，攞桶裝水，仔細地抹的士車身，劉國勳同麥美娟咁啱一齊合作抹一部的士，抹抹吓，劉就畀麥「責備」，事關劉抹嚟抹去，抹到塊布黑晒，都唔識轉吓塊布，用另外乾淨嗰邊去抹，抹到咁上下，又冇去洗乾淨塊布喎，搞到麥好勞氣喇！
麥美娟仲講明喺平日會做家務㗎，自己部車雖然就會喺出面洗，但自己都會跟手仔細清潔車入面啲座位、車頭㗎，仲話呢啲嘢完全難唔到佢。