政情：誤推動物傳心師 教局畀錯料累學子
動物傳心師解讀玩具龜「布歐」心底話，呢單喺一七年嘅新聞大家仲記唔記得？市民記唔記得就唔肯定喇，但睇嚟教育局就無上心，搞到教育界議員葉建源（葉Sir）尋日喺Facebook出貼寸政府，話教育局有帶頭誤導市民學習偽科學之嫌。
載生涯規劃網頁 葉建源鬧爆
葉Sir話喺玩具龜嘅報道出街後兩年幾，教育局嘅「生涯規劃」網頁上，仲有「動物傳心師」嘅職業資訊，又話動物傳心師嘅職責係「以心靈感應與動物溝通」、「了解動物的想法並進行輔導」等，甚至提到入職條件係擁有報道入面所指機構嘅認可動物傳心師證書。
呢單嘢之後被踢爆係造假嘅，但教育局完全冇反應囉。葉Sir覺得教育局嘅網站理應向學生提供準確、真實嘅生涯規劃資訊，但網站反而列有懷疑造假或尚未驗證嘅行業資訊，擔心會誤導市民以為課程已獲政府認可，於是佢之前去信教育局反映意見，局方先喺網站刪咗相關資料咋！