政情：抗疫基金漏洞多 中介謀發災難財
香港各行業喺「疫」市下經營困難，飲食業更係首當其衝。政府早前為咗救市，推出三百億元「防疫抗疫基金」，當中食肆都有資助。之不過有區議員尋日就發現，有中介公司想渾水摸魚，藉着「幫」食肆代申抗疫基金而抽水，覺得政府應該要做好申請資助嘅解說工作，避免有騙案發生。
「防疫抗疫基金」向多個唔同嘅業界提供資助，包括飲食業界，普通食肆等持牌人可獲二十萬元，小食或食物製造廠等持牌人可獲八萬元資助，而食物環境衞生署早前已開始接受申請。
顏汶羽斥食人血饅頭
話說觀塘區議員顏汶羽尋日喺社交平台發貼，並上載咗一張中介公司宣傳單張嘅相，上面寫住「代辦申領八萬元資助」同「不成功不收費」嘅字眼，而顏亦喺貼中大鬧：「離晒大譜！飲食界已經係凍封時期，難得政府肯畀少少資助，喺艱難時刻扶持下，但竟然仲有公司咁都仲要抽水！」另外，佢亦喺文末加咗「聽講抽水一成」同「災難財唔應該發」嘅hashtag。
顏喺回覆查詢時話，宣傳單張係一個街坊喺土瓜灣收到send畀佢，仲話街坊收到嗰時嬲到震，覺得呢個時勢下，仲食呢啲人血饅頭有無搞錯。佢又話事件證明政府嘅工作唔夠細緻，有好多人唔識填申請表，加上資訊不平衡，搞到出現咗另類新生意。
問到擔唔擔心中介公司會幫唔合資格食肆造數去申請資助嘅情況出現，顏就覺得造數有啲難度，反而更加擔心中介公司喺咪真喺做到「不成功不收費」，否則顏提醒不幸誤墮騙網嘅市民，記得要報警求助。佢又希望政府最好加強申請資助嘅解說工作，令需要援助嘅小商販識得直接向政府申請。
促食環署快解說補漏
飲食界議員張宇人都話業界對申請資助有疑惑的話，歡迎搵佢幫手，又話依家大部分業界都填咗表格申請資助喇，佢唔覺得表格有乜嘢問題同難填喎。
既然有呢啲中介公司出現，食店老闆都係要小心為上，依家有區議員質疑做得唔夠細緻，唔該食環署署長劉利群快啲補漏，以免店主應得嘅資助化為烏有。