中環出更：疫下無居權禁入境 葉劉爆建制圈諗緊
社會上有聲音要求政府全面封關，而正在家居隔離嘅行政會議成員兼議員葉劉淑儀尋日喺社交平台貼文，爆料話建制政圈內唔少人士正探討緊，係咪應先禁止無居留權嘅人士入境，以至要求非緊急服務嘅機構同舖頭暫停營業。至於呢方面嘅探討有冇同政府講過，佢就話不便透露嘞！
葉劉話相關人士明白到咁做會對經濟造成好大嘅打擊，但正所謂「長痛不如短痛」，相關措施能減低社區傳播，遏制疫情，等香港早日走出困境。佢回覆本報查詢時話，如果政府要推行呢個咁極端嘅政策，就要用下一輪嘅經濟措施補貼業界。
倘封城 要推更嚴厲防疫措施
政府點解喺呢個關鍵時刻仍未果斷「封城」？佢話「封城」並非淨係強制外地抵港人士隔離十四日，而係效法其他國家或地區採取更嚴厲嘅防疫措施，包括禁止所有非香港居民入境，要求關閉酒吧等娛樂場所，又指《基本法》第四十八條（四）列明，特首可決定政府政策同發布行政命令，雖然條例賦予特首相關權力，但回歸至今未有特首用過，而香港喺普通法嘅法律基礎制度下，亦唔知道條例點樣行使。
雖然佢贊成政府應該引用以上條文，但亦擔心當局引用時會被司法覆核挑戰，正如修例風波期間，有人就政府引用《緊急法》提出司法覆核。佢解釋，只有立法會先可以立法，行政機關唔能夠取代其立法嘅地位，否則會引起憲制爭議。佢建議政府應先徵詢基本法委員會意見，加強法律政策研究，再喺適當時候訂下行政指令。
卓妮