中環出更：回收玻璃樽再造 蕭楚基：靠阿仔啟發
香港話要做環保回收都好多年喇，可惜成效一直麻麻。近年政府就推「綠色校園2.0」計劃，話會喺校園增設玻璃樽回收桶，算係由細培養下一代嘅環保意識。綠色環保互助委員會主席蕭楚基（CK）就受囝囝啟發，聯同保良局同懲教署一齊搞「玻璃樽再造計劃」，希望可以將環保觀念傳畀下一代。
話說自從囝囝喺加拿大讀書返嚟之後，CK就有呢個諗法，「不過都成廿幾年喇」，仲話當年對環保回收源頭分類嘅觀念大增，反觀香港嘅環保意識多年嚟都停滯不前，令佢深明自細培養嘅重要性。唔知係咪畀囝囝教精，CK依家去買外賣，都會自備食物盒咁話。
其實保良局主席馬清楠對推動下一代環保意識都好有興趣。有次CK同馬清楠傾開回收玻璃樽再造呢個諗法，兩個人一拍即合，計劃嘅雛形就慢慢成形喇！聽CK講，計劃最先預計喺舊年六月左右推出，但因為當時撞正社會事件，都擔心會敏感，所以一直延遲到今年三月先推出。
保護海洋 馬清楠唔用飲管
馬清楠話舊時細個好慳家，「就算啲嘢爛咗都唔捨得掉」，所以佢依家都會叫仔女唔好咁快掉嘢，要環保啲。佢仲話為咗保護海洋，依家都唔用飲管，希望可以為地球出多一分力。
同場嘅仲有保良局總理何許頴嘉夫婦，佢哋都話有教三歲囝囝做好垃圾源頭分類，仲話每次囝囝幫手洗乾淨啲膠樽、汽水罐，囝囝就會覺得好開心好好玩添！佢哋兩公婆都好有環保意識，平時出街食飯都會自備餐具，話要為囝囝做個好榜樣喎。
卓妮