政情：黨友告示惹聲討 楊岳橋被指包庇縱容
深水埗區議員李文浩同劉家衡早前喺佢哋嘅聯合辦事處門外，貼咗「藍絲與狗不得內進」嘅手寫告示，連日嚟有唔少人上門聲討，仲一度爆發肢體推撞。議員周浩鼎尋日就鬧劉家衡所屬嘅公民黨（公文袋）黨魁楊岳橋一直唔回應事件，係縱容同包庇。
周浩鼎鬧民主派只識卸責
民主派議員尋日係立法會大會提出終止待續，周浩鼎發言時話民主派議員刻意拖延政府臨時撥款，令本港醫療同福利服務受阻，鬧民主派唔知個醜字點寫。佢又話好佩服公民黨，指公文袋嘅劉家衡既然講「藍絲與狗不得內進」玩到咁開心，但公文袋竟然到依家都無回應過，仲反問民主派議員，到底係邊個縱容同包庇暴力？
對於尋日曾一度流會，周批評係民主派刻意造成，又鬧民主派係咪仲嫌香港唔夠衰，淨係識得推卸責任。