政情：何啟明話出機票錢 請張超雄去美國
話說立法會尋日繼續審議緊臨時撥款議案，唔少民主派批評港府做得差，工黨嘅張超雄引述有評論形容香港係Failed State（失敗城市），批評政府保護唔到市民。其後，工聯會嘅勞工界議員何啟明發言時就反問張超雄，話如果香港就如張所講咁失敗，留喺度做乜嘢，「你走啦，去美國啦，我畀機票錢你去美國。」
寸張唱衰香港
寸完張超雄唱衰香港之後，何啟明仲提醒張，話「去嗰邊記得唔好戴口罩，戴口罩畀人打，你小心啲，嗰邊仲有槍添」。何話外國防疫唔畀人戴口罩，而香港情況尚可，如果真係失敗城市，唔會咁多留學生返嚟香港。張超雄聞言就提規程問題，指何讀錯英文仲要求澄清，何就話「你咁想去，我真係畀張機票你」，仲叫張買完機票返嚟報銷，「好平咋依家，依家返嚟好貴，冇三、四萬蚊買唔到張機票，仲要一個禮拜之後，去你隨時都有得去，隨時請你過去」。
另外，公民黨（公文袋）嘅議員郭家麒喺發言時批評草菅人命嘅人係白癡，工聯會嘅議員黃國健隨即提規程問題要求佢澄清鬧邊個白癡，郭就話冇講係邊個，如果黃想認就認咗去。其後，郭繼續發言講撥款，但被主席梁君彥指離題，其後郭就鬧梁低能，隨即被中止發言。