政情：過氣港督 肥彭又回魂 刷存在感

肥彭日前聯同英國人權組織「香港監察」成員去信英國外交部，要求當局就美國媒體近日被中國打壓發聲，文中提到中國外交部驅逐喺《華盛頓郵報》、《華爾街日報》或《紐約時報》任職嘅英國公民，唔容許佢哋日後繼續喺中國，包括港澳兩地從事記者工作嘅做法正嚴重侵犯新聞自由、侵蝕香港嘅基本自由同自主權，促英方履行作為《中英聯合聲明》簽署人嘅責任。

政界斥狗口長不出象牙

呢番舉動同言論，肥彭好似仲當正自己係港督咁，喺度指手畫腳，當然被鬧爆喇！「廿三萬監察」發言人王國興直斥肥彭同「香港監察」嘅言論係「狗口長不出象牙」，肥彭只係過氣港督，去信英國外交部純粹係「刷存在感」同多此一舉，王又指有關事件係中國同美國之間嘅較量，絕不容許有其他國家插手理會。

王國興又話今次中方反制行動係「以其人之道，還治其人之身」，皆因美國係率先挑起事端嘅一方，過去亦曾針對中國新聞機構，粗暴干涉中國記者喺美國進行採訪工作，中方採取同等嘅態度回應美方打壓，絕對係合情合理同維護國家尊嚴。

學者批言論誤導外國人

理工大學專業及持續教育學院講師陳偉強批評肥彭同「香港監察」信中嘅內容根本係說三道四，加上肥彭已離開香港多年，內文未必能完全反映事實，容易誤導外國讀者對事件嘅睇法。陳又提到過往美國亦曾限制中方媒體喺美國工作嘅人數，但又唔見肥彭就呢件事發聲，陳話假如中方覺得有人威脅國家安全，有權利批出工作簽證，決定係咪准許外國媒體喺國內採訪。

話時話，肥彭可能自知政治光環已經消失，又可能驚死被人遺忘，所以但凡香港有乜嘢事，佢就走出嚟指指點點，想引起其他人嘅注意，但次次都畀人鬧爆嘅，咁佢應該知道唔會再有人畀佢嗰啲歪理呃到，好心佢就知醜，唔好再出聲喇！