中環出更：麥美娟郭榮鏗開火 大講「粗口經」
民主派經常喺立法會拉布玩嘢，搞到唔少民生議案都審議唔到，惹來唔少批評。工聯會嘅議員麥美娟（Alice）尋日就鬧爆民主派拉布「做嚟做去都係嗰幾招」，形容為「成班契弟做嚟做去都係嗰幾招」。
鬧民主派契弟 話無意侮辱
話說Alice發言時話民主派只係為咗政治目的而影響基層市民生活，批評佢哋拉布策略只係得流會同點人數，仲話「好心啦你契哥畀咗咁多口罩你哋，做嘢吖嘛，仲係攞呢啲招」。一聽到「契弟」兩個字，公民黨（公文袋）嘅議員郭榮鏗就要求澄清用詞係咪適合喺議會使用，但Alice就反駁，話發言時先講「契哥」，再講「契弟」，所以佢係好多人嘅「契姐」，仲解釋話係描述一種關係，無意侮辱，如果民主派覺得有冒犯就應該要思考當中原因，甚至話可以改叫「乾弟」。
郭榮鏗之後點名回應Alice，指佢聲稱代表基層同勞工界，但滿口粗言穢語，係影衰基層市民，仲話「大家都知邊個係粗口娟吖」，又提起Alice爆粗鬧特首林鄭月娥嘅傳聞，話「你講粗口鬧佢（林鄭月娥），你最唔鍾意佢啦，夠膽你就出嚟講嘛，唔好喺閉門會議匿埋，堂堂正正喺度講嘛，你冇膽識喺度講真心話先係契乜契乜呀」。但Alice都唔執輸，話「講粗口冇乜嘢嘅，你哋講啲嘢比粗口更難聽啦」，仲直斥郭係讀咁多書嘅藍血議員。換言之，係鬧佢唔知民間疾苦啦！