中環出更：全城避疫閒在家 楊靜自學包餃子
新冠肺炎全球爆發，好多喺外國留學嘅港人子女都趕返香港避疫情，香港中華出入口商會副秘書長楊靜（Sally）嘅細女亦喺上星期由英國返港，「全副武裝」上機，返港後再自我居家隔離十四日。
Sally兩個女都喺英國讀書，而細女全副武裝上飛機，例如上機前已經戴好口罩，同一次性雨衣，紮起頭髮，換埋3M口罩、手套，仲要消毒座位。佢話細女喺機場已食飽，上機前去完洗手間，喺飛機上唔飲唔食十個鐘淨係瞓覺，但細女返到屋企想抱寵物狗仔都要戴口罩。至於大女，佢話因為今年碩士畢業，所以無返嚟住，但已經儲足食物同用品留喺英國嘅屋企。疫情來襲大家都留係屋企，Sally見「宅」喺屋企無嘢做，就上網學包餃子畀囡囡食，連餃子皮都自己整。
鍾國斌澄清「布口罩」未推出市場
議員梁美芬（Priscilla）尋日就喺Facebook貼文，自爆阿仔喺周二由外國返港，喺機場抵港後立即去另一個地方自我隔離十四日。Priscilla話每日都只係同阿仔通電話，又話阿仔喺美國嘅大學讀碩士課程，而嗰邊疫情都幾嚴重，學校亦提早改由網上教學，所以決定返港，而選擇自我隔離係為咗家人嘅安全着想同唔想影響佢嘅工作。
記得紡織及製衣界議員鍾國斌（Felix）個女都喺英國留學，而Felix就話阿女讀完書，返咗嚟成年嘞！問起佢喺社交平台話同理工大學合作研發可重用六十次嘅布口罩，未推出市場就有人「搶閘」周街賣冒牌貨，佢話收到朋友通知後，就急急澄清並無用作零售用途，以免市民受騙，買咗劣質口罩，佢仲話會考慮採取法律行動追究添！
卓妮