立法會明日恢復召開大會，民主派議員尋日去信立法會主席梁君彥，要求梁交代立法會會議運作準則同防疫策略，仲提議短期內去過爆發疫情地區嘅人唔好進入立法會大樓。不過民主派多名議員啱啱先由已爆發疫情嘅美國返港，咁講佢哋係咪唔可以入大樓開會呢？今次佢哋真係分分鐘捉蟲搞着自己喇。
民主派議員喺信中指出，如果立法會大會明日復會，就等於全面恢復運作，但依家疫情喺日韓歐美陸續大爆發，認為梁應交代立法會會議運作準則同防疫策略，畀各委員會主席同議員參考，避免各行其是。佢哋又話，依家立法會大樓防疫措施已經係兩星期前更新，認為應至少每周審視一次防疫措施，包括係咪要強烈勸喻短期內去過爆發疫情的地區嘅人唔好進入大樓。
之不過今次有份聯署嘅議員莫乃光、梁繼昌同譚文豪三月初先去咗美國交流，美國已有逾一千七百宗確診病例。如果依照民主派嘅講法，呢三名去完美國嘅議員似乎都唔應該入大樓喇。