政情：張國鈞教錯兩女功課 激奀太座
學校停課，唔想子女留喺屋企無所事事，家長就真係費煞思量。議員張國鈞（Horace）近日抽時間陪兩個女做功課，誰知佢太太見到，就鬧佢「錯晒！唔好再教佢哋啦！」莫非Horace連小學嘅功課都搞唔掂？
Horace解釋話，小朋友雖然唔使返學，但係功課仍然透過網絡，陸續有來。於是就試吓陪小朋友做功課喇，佢以為答案必定冇問題，然而太太一記當頭棒喝，先至發現格式錯晒喎。Horace話男人始終唔及得女人咁細心，所以教功課呢個重任都係交番畀老婆喇，陪小朋友玩先至係自己嘅擅長。
索性「做拳靶」任人打
困喺屋企到底有乜嘢得意嘢玩？Horace話佢兩個女最近迷上打拳，咁啱佢之前都算係學過吓，於是就索性拎起拳靶「任人打」，一齊玩之餘又順便消耗一下小朋友嘅精力。雖然小朋友放緊悠長假期，但終歸都會復課，Horace就擔心到時唔夠兒童口罩，佢希望政府唔好心急，到時採取分階段復課，否則出事嘅話，政府都要孭好大責任o架！