政情：訂晒門票 彭芷君擔心奧運搞唔成
唔少家庭都會趁暑假安排節目或者外遊散心，雖然依家距離暑假仲有幾個月，但係香港廣西婦女聯會主席彭芷君（Gigi）已經打算今年七月下旬舉家前往日本觀賞東京奧運。之不過，喺新冠肺炎疫情來勢洶洶下，Gigi都擔心行程會告吹。
08年京奧已錯過重要時刻
從未親身觀賞奧運賽事嘅Gigi話，佢媽咪喺○八年為北京奧運擔任火炬手，當時佢想過躬逢其會，但最後都因準備懷孕而作罷。去年佢透過旅行社預訂今年東京奧運其中幾項賽事門票。因配額限制，佢最心儀嘅網球賽事就冇得睇喇，但其兒子好想睇嘅籃球同跳水嘅門票就已穩握在手。但因為疫情不斷擴散，唔少人都擔心東京奧運能否如期舉行，若最終取消，Gigi親赴奧運會場觀賽嘅願望又要推後幾年喇。
Gigi爸爸、港協暨奧委會名譽顧問彭冲就話，相信國際奧委會好快會作出決定，而日本為奧運會投下巨額資金，運動員亦準備就緒，相信一旦告吹，大家都會好失望喇。