政情：林建岳感謝醫護竭力抗疫 百萬元捐港大醫學院內科學系

女兒林顥伊代送上支票

捐款支票由林建岳女兒林顥伊代為送上，港大醫學院內科學系系主任劉澤星、副系主任林志良就代表醫學院接收支票。劉澤星對林建岳嘅慷慨捐助表示衷心感謝。

劉澤星話，喺經歷沙士、禽流感、豬流感，以至近期嘅新冠肺炎疫情之後，意識到有必要加強醫科生喺應對傳染病方面嘅教育同訓練。尤其係新冠肺炎疫情爆發後，港大自一月底以嚟，暫停臨床課程到依家，點樣去加強網上學習，以至尋求其他學習方式，都係必須投入資源去作長遠規劃嘅。

劉澤星仲話，喺感謝林建岳嘅捐款之餘，亦都希望可以將捐款用喺呢方面嘅研究同規劃上喎。