政情：羅智光一味拖 建制泛民齊開火
因應疫情關係，立法會早前取消大部分會議。立法會公務員及資助機構員工事務委員會尋日開會，委員會主席郭偉強建議加會討論延長公務員服務年期同政府五天工作周事宜，但不論建制定泛民都話冇迫切性，反而兩邊陣營都想討論公務員政治中立事宜，以及跟進立法禁止侮辱公職人員。但公務員事務局局長羅智光就話，何謂政治中立過去講得好清楚，又話保安局現正就立法禁止侮辱公職人員進行研究。結果到最後乜嘢都討論唔到，羅擺明拖得就拖。唔怪得兩陣營都要狙擊佢喇。
會議開始嘅時候，郭偉強話上月取消咗會議，建議加會「補數」，以討論延長公務員服務年期同政府五天工作周安排。此時泛民議員林卓廷話睇唔到迫切性，反而部分公務員喺職場同網絡上都面臨好大壓力，希望政府解釋點樣先叫政治中立，又要求下次會議討論公務員政治中立問題。
「公務員政治中立」 研究無了期
泛民同建制派向來水火不容，不過在場嘅多位建制派議員今次都對林卓廷嘅要求冇意見，仲話五天工作周傾咗好幾年，都冇乜特別大進展，如果只有恒常報告就不如算喇。其中議員謝偉銓就話只要政府有準備，乜嘢都可以傾，仲話立法禁止侮辱公職人員罪都唔少人提及，最後有幾多議程都冇所謂，相信郭偉強會分配時間。
羅智光可能見唔對路，就即刻解釋話傾政治中立議題唔可以討論個別個案，保安局亦未完成有關立法禁止侮辱公職人員嘅研究。話音未落，建制派議員葛珮帆就乘勢狙擊，要求羅定出時間表，仲鬧爆羅︰「每次都話研究緊，都唔知研究到幾時！」林卓廷就重申只討論政策，唔討論個案，叫羅唔好再拖。
圖作絕地反撲 遭拋窒即縮沙
羅智光似乎想作最後反擊，話林卓廷曾多次討論個案。林就反駁話郭偉強先係負責主持會議，質問羅係咪質疑郭主持會議嘅能力。羅隨即縮沙，話冇意圖阻礙主席行使主持會議權力，只係覺得討論個案要好小心。郭就話，查實議員蔣麗芸早前都有提出要討論公務員政治中立議題，又話討論都要局方要有嘢答先得，否則得議員講晒都冇結果。郭仲叫羅「返屋企做吓功課啦！」睇嚟羅都好難走得甩喇。