中環出更：陳帥夫開會抹咪 黃國健當眾撩牙
新冠肺炎疫情嚴重，人人出門都做足防疫措施。尋日立法會政制事務委員會開會，出席會議嘅政制及內地事務局副局長陳帥夫唔單止乖乖戴住口罩，會議前仲做咗一個小動作，就係用消毒濕紙巾做清潔，睇嚟佢都真係幾擔心疫情問題喇。
尋日陳帥夫一坐低，就即刻拎出消毒濕紙巾慢慢仔細地清潔座位上支咪，做足防護措施，而坐佢隔籬嘅人員亦都係咁抹，甚至仲抹得仔細過佢添。問番陳係咪好擔心染疫，佢就話呢個時勢真係小心啲好，所以養成咗呢個小習慣，做足清潔。至於有咩防疫小錦囊，佢就笑笑話，都係戴口罩同多洗手，小心為妙。對於最近有指用太多酒精搓手掖易傷手，甚至會令皮膚痕癢過敏，陳就話唔太擔心，因為每個人膚質都唔同喎。
葉劉全程冇戴口罩
陳帥夫小心做足防疫措施，另一邊廂議員葉劉淑儀（葉劉）同黃碧雲（一舊雲）就冇戴口罩。一舊雲入到會議室先醒覺冇戴罩，拿拿臨戴番，葉劉就全程都冇戴。至於議員黃國健仲離譜，冇戴口罩之餘仲當眾撩牙，真係見到都怕怕。
卓妮