政情：開會冇戴罩 峯鴿唔衞生捱鬧
新冠肺炎疫情蔓延至全球，有個別港人返港更被確診，亦有唔少人去完旅行返港後自動進行自我隔離。民主黨（白鴿黨）議員許智峯（峯鴿）最近曾外訪北歐，去過挪威，點知返嚟就被議員何啟明批評佢唔戴口罩，冇公眾衞生意識。
何啟明點名批評 泛民護航叫囂
財務委員會尋日召開會議，但在席嘅峯鴿冇戴口罩，隨即被何啟明點名批評。何話挪威有成一百七十六宗新冠肺炎嘅確診個案，認為峯鴿應該要為咗各位議員嘅安全同埋要有公眾衞生意識，建議佢要戴番口罩。
何講完呢番說話之後，隨即惹起民主派議員不滿，當中有人隨即大叫，認為何應該叫政府官員帶頭戴口罩先。不過，財委會主席陳健波聞言就只係話，覺得議員最好係戴口罩，仲話係個人選擇，講完就請下一位議員發言添！至於峯鴿就繼續冇戴口罩，亦都冇出言反駁。