政情：被轟走狗人渣 李文浩與示威者推撞互罵
深水埗區議員李文浩日前喺其議員辦事處外貼出「藍絲與狗不得內進」嘅通告後，連續三日有市民到議辦踩場抗議。十多名市民尋日到李嘅議辦外示威，雙方互罵同出現推撞，喺混亂中更有人跌倒。
到議辦抗議嘅市民高舉印有李嘅頭像同寫上「入職發假誓，人渣區議員」嘅字牌，又將寫上「走狗李文浩」嘅紙張貼上玻璃門，雙方隔住玻璃門互罵。李揸住咪強調冇違反宣誓，因為區議員唔使宣誓，又指上門抗議嘅人可以講，但唔可以破壞、襲擊辦事處嘅職員同騷擾附近嘅人，又話「你哋（在場抗議嘅市民）要多謝我哋，因為我李文浩，你哋先有工開，有得收錢，我先係你哋嘅衣食父母」。
其後，有市民衝開玻璃門，雙方即出現推撞同擲物品，場面極度混亂，經過一番擾攘後，示威者一度離開，但其中一名男示威者折返表明自己係中國人，係咪可以入議辦，李同職員講明中國人可以入，但唔歡迎佢同藍絲。講講吓，有人跌咗物件落地，混亂間，該名男示威者跌倒。
續叫嚷藍絲與狗不得內進
李不停話議辦係自資嘅私人地方，冇攞區議會錢，講明藍絲與狗不得內進，叫班示威者離開，當時示威者亦陸續乘搭電梯離去。警方表示，初步將事件列作刑事毀壞同普通襲擊。據了解，警員到場，發現現場有一部閉路電視被損毀，警員經調查，三名涉嫌襲擊及刑事毀壞嘅人士被捕。