政情：食署發夢懶問 建垃圾站8層變6層
話說政府計劃喺洪水橋興建垃圾站，元朗區議會環境、氣候變化及漁農業委員會尋日開會討論有關嘅進度，有委員覺得新垃圾站設計無諮詢過公眾嘅做法唔合理，亦無善用土地嘅地積比，因而全票通過要求食物環境衞生署暫停新垃圾站項目嘅動議。
其實起新垃圾站嘅方案早喺舊年三月已獲上屆相關嘅委員會一致通過，但時移勢易，今屆委員會就覺得署方交代嘅新垃圾站設計方案既唔清晰又嘥料，將最多可以起八層嘅地皮，設計成只有六層，但署方代表就話事前唔知呢件事，之前收到嘅指示係最多起六層咁話。
起街市拖7年遭寸爆
話口未完，即刻畀區議員陳樹暉踢爆，指舊年已有文件寫到明新垃圾站最高可起八層，只係署方懶理，委員會主席梁德明亦忍唔住暗寸食環署「如夢初醒」，依家先搞清狀況。最後，仲全票通過暫停新垃圾站項目嘅動議。
會上亦討論咗天水圍新永久同臨時街市嘅進度，先有一班天水圍街坊喺會前到場請願，要求喺天南起多個臨時街市，話咁先夠區內街坊用，亦有議員窒食環署，話起個永久街市都要七年，真係成個屋苑都起到啦！