政情：「不倒下 不返港」 馮浩賢續留守武漢
內地新冠肺炎疫情仍然嚴峻，港府最近派出多班包機接回滯留湖北省嘅港人。香港駐武漢辦主任馮浩賢（Vincent）昨日喺社交平台發文，話作為「武漢站站長」會繼續留守，然後乘搭最後一班包機回港。
多謝老婆打點屋企兼打氣
有市民以為Vincent已隨包機回港，佢就喺文中澄清，指除非自己倒下，否則作為「武漢站站長」，會盡力將滯留武漢嘅港人帶返香港，先至會坐最後一班機離開。佢又呻話過去四十多日實在「太充實」，包括要建立前線指揮部、處理超過二千宗求助個案、到處撲病床、設立「千里派藥」物流系統、搵非牟利組織幫手解決當地港人其他生活所需、協助策劃「散水行動」等。今日回首一看實在百感交集，又話回港之後要搞「見招拆招」分享會添。
三八婦女節啱啱過去，Vincent都不忘向「家中的女領導」致敬。佢感謝老婆將屋企一切打點得井然有序，仲成日為佢打氣。Vincent仲話做家務唔係佢嘅強項，覺得每日煮飯、洗衫、洗廁所，真係會肌肉勞損呀！