政情：議員追殺陳帆 減交通費救打工仔

政府搞咗個可加可減機制出嚟，但已被嘲為只加不減機制，無論港鐵、巴士、小巴同渡輪等年年都加價，打工仔真係好難頂，正如近年頻頻爆醜聞兼發生事故嘅港鐵，雖則話今年唔加價，但都被批評票價高。

其實，港鐵屯馬線第一期喺二月中通車後，議員田北辰早前話依家如果搭西鐵線，由屯門去金鐘嘅票價係三十六蚊，但如果搭沙中線由上水，經旺角轉車去金鐘，只係需要二十五蚊，所以佢建議下調西鐵線票價，大幅減七蚊，用距離嚟制訂票價，咁先可以令市民心服口服(口架)嘛！

港鐵盈餘充足 議員盼帶頭紓困

調低一條線嘅票價並唔夠，經民聯直頭建議港鐵全面減票價，佢哋尋日同陳帆見面，指疫情之下仲有好多市民仍然要返工，加上遲吓中小學會喺四月中復課，港鐵作為香港人出行嘅重要交通工具，應該減票價兩至三成。議員盧偉國指疫情無咁快斷尾，就算之後疫情受控，市民仍然飽受經濟衝擊，所以佢哋提議港鐵喺嚟緊四月開始去到今年年尾減票價。

盧又指港鐵年年賺百幾億，盈餘充足，絕對可以應付減價，減票價既務實可行又可以惠及民生，仲話港鐵近年頻繁出現技術事故，喺風險管理同技術改良上應該落多啲工夫，雖然港鐵短期內嘅收入會減少，但可以挽回市民嘅信心。

佢嘅黨友、身兼行會成員嘅議員林健鋒就話港鐵作為上市公司，應該要有社會責任，減少市民出行費用，同市民共度時艱。佢又話政府係港鐵嘅大股東，希望港鐵可以做到帶頭作用，令其他公共設施公司倣效，一齊減價。

已爆發倒閉潮 勢湧現失業大軍

老實講，倒閉潮已經出現，好快湧現失業大軍。中小企早前亦叫政府起帶頭作用，等地產商倣效減租，保住中小企同打工仔嘅飯碗。既然政府係港鐵嘅大股東，就應該快帶頭減價，幫輕吓小市民嘅交通負擔。