中環出更：尹兆堅被指離題 衝主席台遭趕返埋位
議員經常喺議事廳發言離晒題，正如昨午嘅財務委員會，喺審議基本工程儲備基金嘅撥款期間，九泛民主派議員發言被指離題，嬲到衝向主席台。
話說講緊撥款申請當中有部分係涉及翻新警署報案室，唔少民主派議員就追問去年七月廿一日嘅事件，當中尹兆堅喺發言時就表明，提問係關於報案室翻新工程，不過係問去年七月廿一日，到底有幾多市民去元朗警署報案室報案，同埋做法有冇違反警例。財委會主席陳健波就質疑尹離題，尹就辯稱係講緊值唔值得審批撥款，仲話之前一路都有問到，而相關嘅政府官員亦都有回應。
波叔批發問技巧差
不過陳就一於少理，認為尹嘅提問唔相關，唔畀官員回應。尹就即刻衝向主席台，要求官員回應，仲鬧爆陳偏幫警察，但陳就話唔係財務建議，所以唔畀官員答，仲要求尹返埋位，否則趕佢出去，而尹最後都返咗埋位。
尹嘅黨友林卓廷就話依家報案室好多時都會閉門，關注翻新之後會係門常開定門常關。尹後來批評陳何以容許林問，但就唔畀佢問，又質疑「係咪我好恰啲」。而陳就話尹發問技巧唔好，仲叫佢請教番林。點知尹嘅怒火並冇平息，鬧爆陳離譜、雙重標準，而林就話自己係倣效尹去發問，質疑陳冇聽到尹發言。不過陳就話已經裁決咗，唔會再檢討，之後就冇再回應喇。
卓妮