中環出更：復工防疫安排隔離 孫蔡吐媚善待伙記
唔少企業近日因新冠肺炎疫情導致生意下滑，有啲公司仲逼住裁員，經營服裝商標織造嘅仁濟醫院副主席孫蔡吐媚 （Mary）就話生意確受影響，不過佢話明白好多員工都有家庭負擔，因此會嘗試作出調動，等各地廠房嘅員工都可以有工開咁話。
卓妮日前喺一個活動見到孫太，就向佢打聽吓經營狀況。佢話已經響應政府呼籲，安排員工居家工作。孫太因疫情關係避免北上，內地業務就要透過電子通訊，向員工遙遠下達指示以維持運作。儘管武漢係疫情重災區，但孫太話當地嘅百多名員工都無一染病，佢又響廣東省安排咗一棟大樓，等喺武漢返嚟嘅員工有地方安心隔離，希望大家都可以同舟共濟，一齊度過呢段艱難嘅日子。
港人見慣風浪 鄭錦鐘對市道樂觀
保良局前主席鄭錦鐘雖然退咗休，但仍然關心公益事務。佢話近日訂咗好多防疫物資，將會派贈畀有需要嘅人。佢又認為政府係時候動用儲備，幫大家對抗疫情。對於香港前景，鄭錦鐘就比較樂觀，話唔擔心今次疫情會有好大影響，因為港人見慣風浪，沙士同金融海嘯都撐得過之餘，大家都學精咗識得積穀防饑，況且經濟有高有低好正常，相信本地市道好快會復甦番。
就近日市面多次出現搶購潮，保良局副主席陳黎惠蓮（Winnie）就一啲都唔擔心，佢話坊間謠傳雖則言之鑿鑿，然而好快就有人出嚟澄清，自己亦會用平常心去看待疫情。至於漂白水之類嘅用品，佢頂多額外買多一樽備用。其實一窩蜂咁去搶購好唔理性，不如留番畀有需要嘅人仲好喇。Winnie老公陳永錕就話自己做財務生意，無論經濟起伏都有息收，不過市道恢復興旺，大家賺多啲就當然更好喇。
卓妮