由於早前唔少新冠肺炎病人隱瞞外遊史，為免醫護人員被感染，公立醫院上月起可翻查病人利用香港身份證嘅出入境紀錄，點知只可以查閱持有香港身份證病人出入境紀錄，查唔到持外國護照者嘅外遊史，食物及衞生局局長陳肇始隨即補鑊，話會研究擴大監察範圍。話時話，政府喺新冠肺炎嘅防疫措施慢幾十拍，陳肇始已被外界炮轟後知後覺，依家仲不停要補漏，仲要愈補愈漏，市民真係唔知點算好？
