政情：黃冰芬董健莉憶區議員生涯壓力大
今屆區議會出現「大換血」嘅情況，沙田區前區議員黃冰芬（Iris）同董健莉（Kelly）今屆冇做區議員啦，轉而參加基金會研究同協助受示威遊行影響嘅商戶，仲話依家卸任後放鬆咗好多添！
需注重形象 好多事唔做得
點解會輕鬆咗呢？Iris話做區議員有平台服務市民係好事，但自身壓力都好大o架，成日都需要注重形象，搞到想做乜嘢都唔得。佢話做區議員嘅時候試過染頭髮同搽指甲油，但唔少街坊就話咁唔夠「務實」，搞到佢要收埋啲「少女心」。一方面頭髮唔敢染得太淺色，另一方面唔可以搽指甲油之餘，指甲仲唔可以留長。
Kelly都有相似嘅經歷，話雖然街坊唔係以貌取人，但為咗唔好令街坊覺得佢唔注重形象，就連落街篤魚蛋嘅勇氣都冇。每次想食魚蛋，佢都唔敢落街買，惟有託相熟嘅街坊幫手買去佢辦事處先有啖好食，笑言依家就唔使咁拘謹嘞！