政情：李文浩以色揀客 與居民爆粗互罵
深水埗區議員李文浩日前喺其辦事處外張貼「藍絲與狗不得內進」嘅手寫告示，結果被大量不知名嘅電話同短訊騷擾，更有人揚言要斬死李。平機會前日回應指李嘅言論唔涉及現行四條反歧視條例，但平機會主席朱敏健就話公職人員理論上唔應該拒絕服務市民。本以為事件告一段落，點知尋日就有市民去李嘅辦事處外抗議，斥李嘅告示帶有歧視。
廿多名男女喺李嘅辦事處外抗議，又高叫「係我哋納稅養你o架！」李隨即攞住咪高峰反諷對方「廣東話都講唔正」，並反指「我先係你哋班藍絲衣食父母，冇我你哋邊有得收錢上嚟搞事！」李又指住告示話「係我寫嘅，你哋吹得我脹咩？」雙方其後不時爆粗，擾攘半小時後始散去。
網上挑釁 「殺我淨係得把口」
其實李前晚話多謝平機會嘅回覆，指冇被斬死係因為藍絲廢，仲Hashtag標註「打電話過嚟又話斬我又話殺我，淨係得把口」同「真係睇你哋唔起，垃圾藍絲」。
同李合租辦事處嘅區議員劉家衡都寫咗張有相同字眼嘅告示，話驚嚇親辦事處啲貓，所以唔歡迎有狗入嚟，希望大家唔好對號入座。咁其他區議員會唔會倣效？劉話唔清楚，但有責任提醒「同路人」做番啲嘢。