政情：泛民訪美又唱衰香港 乞求外力打自己友

喺舊年六月爆發嘅反修例風波，令唔少西方國家有藉口對香港事務指指點點，美國參眾兩院喺舊年底更通過《香港人權與民主法案》，由美方每年決定香港係咪繼續擁有獨立關稅區嘅地位，以及對被指侵害香港人權人士實施制裁。

無視疫情嚴峻 鼓吹啟動制裁

多名議員近日出訪美國加州，並同華府官員會面。當中三名泛民議員，莫乃光、梁繼昌同譚文豪就借機唱衰香港，唔單止大鬧港府打算用更高程度武力打壓持反對意見嘅市民，仲話政府未來可能會大規模取消泛民候選人嘅參選資格。佢哋更加要求美方盡快公布《香港人權與民主法案》嘅啟動機制同執行細節，以及正式制裁佢哋認為侵害香港人權嘅人士。

早前亦曾出訪美國嘅議員周浩鼎就批評，泛民老遠跑去要求美方制裁香港人，大鬧佢哋鍥而不捨唱衰香港。佢又提到政府正致力應付疫情，但指泛民好似更加關注點樣叫外國制裁香港。佢話一旦香港獨立關稅地位不保，會令經濟更陷於水深火熱。

周又鬧爆泛民要求外國對付自己人嘅做法，批評反對派樂於配合帶有偏見嘅外部勢力，指出建制派雖然行得正、企得正，唔怕被列入制裁名單，但指美方一旦實施制裁將令外國誤以為中央或港府有打壓人權，批評泛民倒自己米，手指拗出唔拗入，更陷國家於不義。

同行議員斥藉機向政府施壓

至於同係出訪加州嘅議員張國鈞亦批評同行嘅三名泛民議員喺未出發前已喺度大肆宣傳話要美國實施《香港人權與民主法案》，批評佢哋打算藉此對港府同公務員造成壓力，提到自己衷心希望泛民同事嘅奸計唔會得逞。

張亦講到，佢同一眾建制派議員有向美方反映，制裁港人只會損害香港嘅高度自治同美國在港利益，又指喺會上有向美方解釋番各件事嘅脈絡同前後背景，強調睇唔到港府過去一年發生同法案條文有牴觸嘅情況，避免美國對香港情況有所誤會。