中環出更：何俊賢玩直播 取名「一賢堂」
新冠肺炎疫情嚴重，搞到之前立法會冇會開，漁農界議員何俊賢（高佬賢）話連發聲嘅平台都少咗，於是玩新意喺Youtube開Live（直播），點知就困難重重，搞咗一大輪先成功開到。
有乜困難？正當高佬賢準備好開Live時，就被通知話帳戶要二十四小時先Activate（激活），冇得即刻使用，搞到佢冇晒Mood（心情）咁話。咁「直播台」叫乜名？佢講笑話要叫「腎賢」或者「賢言亦色」，事關喺平台一打佢個名，竟然有千幾個同名，話要學習議員陳健波嘅「波哥時事台」同前議員鄧家彪嘅「彪噏」咁改番個好名。
諗名搞一大輪 仲係唔滿意
高佬賢成功開到直播後，第一輯就係講「真係劫廁紙咁簡單？」內容講到覺得劫廁紙事件嘅犯罪動機好古怪，佢懷疑牽涉政治動機，覺得警方要全面調查，又分析疫情可能影響人口結構、改變生活素質，好似改善屋宇建築等等喎。
喺日前播第二輯時，節目似係改咗名叫「一賢堂」，好明顯用「一言堂」嚟玩食字，可能仲係唔多滿意，佢話會再諗吓個名喎。
卓妮