中環出更：陳淑芝拋磚引玉 換口罩贈長期病患者
疫情擴散，好多物資都好渴市，例如外科口罩。與其天未光就排隊搶購，不如想吓其他辦法，紫荊青年商會會務顧問陳淑芝不但縫紉有一手，亦精於拋磚引玉之道。
陳淑芝話口罩雖然唔係貴重物品，但由於貨源短缺，大家亦會謹慎使用，而佢近日就聯同幾位童軍領袖同家長，利用製作旗袍所剩下嘅棉質布料，自製咗一批口罩套，作用唔單止係延長外科口罩嘅壽命，又會藉着呢批外觀獨特嘅手工作品，以一個交換五至八個醫用外科口罩，繼而轉贈至長期病患者，以免因缺乏口罩而唔敢到醫院覆診，初步目標係製作二百個口罩套以換取一千個醫用外科口罩。
佢又話因家用衣車嘅效率有限，問朋友借用專業衣車，以加快生產速度，然而兩者嘅操作有些少出入，以致佢要摸索咗兩日，先掌握到專業衣車嘅穿線方式。
就算搜購到一大批口罩，點樣先派到畀有需要嘅人手上亦係一門學問。國際獅子會中國港澳303區總監王恭浩，話饑荒下若有派米嘅消息傳出，好易就會惹來群眾聚而起哄，所以佢哋早前喺印尼購入二十萬個口罩，就透過十七個社區服務機構向實名登記嘅受眾派發，令到呢批得來不易嘅口罩都能落入基層之餘，又可確保井然秩序。
梁麗琴：來路貨也要睇規格
國際獅子會中國港澳303區第二副總監梁麗琴、義務區秘書鄭嘉麒同香港半山獅子會會長黃陳德芬都在場。梁麗琴話因姪女任職空姐，可以乘出差嘅機會幫佢喺海外購買口罩。梁麗琴話唔好以為口罩係來路貨嘅話就必定管用，因為能否阻隔病毒係視乎規格而定，而獅子會派贈嘅外科口罩當然都有相關嘅測試同認證喇！
卓妮