政情：公民講場：政府建過渡屋出錢唔出力 蘇偉文死撐有落水

本港房屋供應量遠遠都應付唔到需求，政府計劃撥款五十億元資助非政府機構興建過渡房屋，尋日立法會財務委員會就審議撥款。多名議員會上鬧爆政府唔落水，只係出錢唔出力、推卸責任。出席會議嘅運輸及房屋局副局長蘇偉文就話有做到協調工作，死撐政府唔單止落水，仲「浸到上心口」，不過佢轉頭又話，由非政府機構興建項目，可以更靈活同更有創意喎。蘇咁講，咪又係為政府搵藉口，定係佢都覺得政府做事真係死板又唔掂檔呀。