政情：疫魔未退 屯門取消6大活動
屯門區議會財務、行政及宣傳委員會尋日開會，討論有關當區今年三至七月期間舉行或開始舉辦活動嘅撥款申請。不過喺新冠肺炎疫情下，啲活動係咪能夠如期進行都未知，結果委員會主席李家偉喺聽取議員意見之後，決定暫時抽起「手遊電競比賽」、「屯門回歸盃足球賽」、「屯門龍舟競渡」等六個活動項目喇。
撥款去向惹關注
雖然為免疫情擴散，取消部分活動都係無可厚非，當區區議員巫堃泰就擔心如果取消活動，當局會點樣處理已批出嘅活動撥款。康樂及文化事務署總經理（藝術節及觀眾發展） 朱靜嫻就話，活動會因應疫情而決定是否改期，如最終無法進行就會取消，假如最後冇動用到款項，將會退番畀區議會。而李家偉亦話，佢將會去信當局，要求詳細交代詳情咁話。
此外，當區亦通過網上直播區議會會議。有議員就話做直播需要手提電話、腳架同電腦。區議會秘書就話會詳細考慮直播要求、配套同技術支援，不過安裝固定裝置如腳架就要部門批准喎。