政情：仔女功課深 考起馬浩文
近月學校都停課以防疫情擴散，香港各界文化促進會執行主席馬浩文都唔例外，其小朋友就讀嘅國際學校都一樣停課，但佢話停課只係無咗上課時間，但其實校方仍會利用網上教學以維持學生嘅學習進度，加上校方要求學生每日睇一本書，家長陪伴子女家居學習，感覺上功課仲多過未停課前喎。
佢話本來聘用三位補習教師，分別為子女補習中文、英文同德文，但礙於疫情，目前就只得負責英文嘅補習教師上門，以致佢同太太都要協助子女某啲功課同溫習，然而時下嘅教材都頗為艱深，有時真係考起家長。
透過不同渠道覓答案
不過，馬浩文話唔識答唔係壞事，反而畀個機會佢教子女知識無界限，父母都唔係通天曉，只要保持求知欲，咁就可以學無止境，然後大家嘗試透過不同嘅渠道尋找答案，都係一個唔錯嘅親子活動。