政情：區議員貼「藍絲與狗不得內進」 平機會竟話不涉歧視
深水埗區議員李文浩喺其辦事處外貼有「本辦事處不為任何藍絲提供服務」、「藍絲與狗不得內進」字句嘅紙張，有關照片流出後，李嘅做法備受爭議，有建制派直言平等機會委員會同民政事務總署都應該跟進事件。平機會尋日終於回應，指有關言論並唔涉及現行四條反歧視條例，但平機會主席朱敏健就認為，區議員唔應該拒絕服務區內任何市民囉。
籲拋開歧見
平機會尋日發聲明回應李文浩辦事處事件。該會就話，根據現有初步資料嚟睇，李文浩辦事處張貼嘅字句並唔涉及四條反歧視條例。而朱敏健就話，區議員係公職人員，其公職包括服務其區內所有市民，理論上就唔應該拒絕服務任何區內嘅市民。朱又強調，平機會一貫立場都係反對任何形式嘅歧視，平機會衷心希望社會各界可以放下歧見，上下一心，團結抗疫，令香港可以盡快渡過難關。
李文浩可以選擇服務對象，但相信選民嘅眼睛係雪亮，呢件事之後仲會唔會支持李，選民自有判斷。