政情：謝偉銓轟政府紓困唔夠「快、細、多」
政府因應新冠肺炎疫情推出紓困措施，但被各行各業批評措施只係杯水車薪、唔夠全面。建築、測量、都市規劃及園境界議員謝偉銓（Tony）都話，政府嘅紓困措施只係可以頂到一陣，而且措施對業界唔公道，直指政府做嘢要「快、細、多」咁話。
Tony前日同建築師學會、測量師學會、規劃師學會同園境師學會代表同發展局官員見面，反映業界喺「疫境」之中。Tony話政府早排推出防疫抗疫基金，但提供嘅補助金只係夠業界頂到一時，而補助金只係涵蓋競投政府工程項目嘅大型公司，淨係做私人機構或發展商項目嘅企業並無受惠，坦言覺得政府咁做對業界唔公道，所以要求當局降低申請門檻，等多啲公司受惠喇。
疑似暗示局長幫唔到手
不過Tony尋日同發展局會面，局長黃偉綸並唔在場。Tony話佢哋冇指明要見局長，因為有時局長反而唔係最清楚細節內容，都係啲公務員落手落腳做。佢咁講，係咪暗示黃幫唔到佢哋，所以見唔見都冇所謂呢？