政情：送藥內地 轟港府厚此薄彼 涂謹申酸氣沖天 工聯會請食葡萄
民主派同建制派一向都針鋒相對，之不過尋日立法會會議室就出現建制派嘅工聯會議員請民主黨議員涂謹申（阿涂）食葡萄嘅場面。話說因為新冠肺炎疫情，唔少港人滯留內地，近日政府就委託工聯會去協助港人，寄藥去廣東省同福建省，但阿涂就質疑有關做法係厚此薄彼，仲批評政府漠視其他市民需要。工聯會議員就揶揄阿涂「一陣酸氣沖天」，完全係吃不到的葡萄係酸的，於是就拎咗一盒葡萄入會議室，放喺阿涂座位，真係寸到爆。
阿涂日前對政府委託工聯會寄藥大表不滿，仲話佢早於二月初已開始幫市民爭取政府寄藥，但衞生署只係幫滯留湖北港人，其他省份就要由佢哋家人自己寄，所以佢惟有自己透過香港郵政協助寄藥。阿涂批評政府透過工聯會寄藥去畀廣東同福建嘅港人，做法係漠視其他市民嘅寄藥需要，質疑政府係咪真心想幫香港人咁話。
黃國健強調寄藥冇收分毫
工聯會議員黃國健（KK）尋日就揶揄阿涂「酸氣沖天」，仲鬧阿涂以小人之心度君子之腹、講嘢不負責任。KK話，唔少住喺內地嘅港人喺政府實施檢疫令後冇得返香港覆診同攞藥，呢班港人喺香港亦冇地址，所以係有好大困難。而佢哋寄藥嘅手續其實都好繁複，要兩邊清關，佢哋安排長駐辦公室嘅藥劑師檢查藥物，再喺社署監督下將藥物封箱再寄出，內地辦事處收到後會再速遞分派。KK強調寄藥服務係義務性質，冇收過分毫，仲寸爆話只有天先知道滯留港人到底收唔收到由阿涂寄出嘅藥物喎。
陸頌雄寸爆 叫捐月薪幫人
對於「請」阿涂吃葡萄呢個寸爆行徑，KK黨友、勞工界議員陸頌雄話，葡萄甜定酸係睇個人心境，就好似飲紅酒咁，嗰日心情好就覺得甜，唔好咪覺得酸囉，但阿涂覺得啲葡萄係甜定酸，佢就唔知喇。陸仲建議阿涂如果咁有心幫港人，不如考慮捐一個月人工咁話。
不過阿涂應該最後都唔知串葡萄甜定酸喇，事關議員朱凱廸提出規程問題，質疑工聯會做法係政治表達，要求拎走，立法會職員最後都將串葡萄拎走。阿涂其後再反駁，話政府冇解釋到點解唔同市民有唔同待遇，佢並冇指摘工聯會收取金錢利益，只係針對政府選擇性提供資助，做法對其他唔透過工聯會尋求協助嘅港人唔公平啫。