中環出更：港台劣評如潮被圍攻 議員促減梁家榮人工
香港電台一向被社會質疑節目內容偏頗，投訴港台嘅聲音此起彼落。一向對港台不滿嘅建制派近日計劃要整頓港台，其中議員何君堯就決定喺立法會審議財政預算案時向港台同掌舵港台嘅廣播處處長梁家榮「開刀」，話要削減港台節目公共事務組撥款同梁嘅人工，而其他建制派亦諗緊計，包括提交質詢同修正案等。睇嚟梁都走唔甩喇。
擬提修正案規限港台
不滿港台嘅又點止何君堯，漁農界議員何俊賢就話，當局應該盡快行動，唔好再畀港台攞新聞自由嚟做失實報道嘅擋箭牌，仲揚言唔排除喺審議財政預算案時提出針對港台嘅修正案。不過佢仲要同黨友商量，因為都要考慮唔同社會聲音，亦都唔想因為針對港台嘅修正案，而令整個預算案無法通過。作為建制派「重炮手」之一嘅勞工界議員陸頌雄亦都話對港台十分不滿，至於有咩方法整頓港台，就要「賣個關子」先喇，到預算案提出修正案限期屆滿之前先至公布。但陸就強調無論用咩方法都好，最終目的就係要規限港台咁話。
建制派勢要狙擊港台同梁家榮，如要削減有關開支就要喺預算案入手，但又唔夠膽反對預算案，會唔會最終得個講字，就要拭目以待喇。
卓妮