中環出更：制服團隊學危機處理 梁永鏗難忘急救長跑選手
參加制服團體可以培養紀律、道德觀同團隊合作精神，交通安全隊早排舉行周年晚宴，出席嘅嘉賓大部分都係年輕時已加入制服團隊，當中包括醫療輔助隊副總監梁永鏗。原來梁已經加入醫療輔助隊廿五年，當初佢喺大學教化學，醫療輔助隊邀請佢做顧問，因為覺得有興趣，就順理成章加入埋醫療輔助隊喇。問到咁多年嚟有咩難忘經歷，佢就話莫過於協助馬拉松賽事喎。
梁永鏗咁多年嚟做過唔同崗位，統籌過好多大型活動，包括幫手籌辦少年團、全港中學生學急救等活動，不過最難忘嘅經歷都係喺馬拉松大型賽事當中。佢話每次賽事都要派出幾百人提供協助，選手喺現場觀眾歡呼之下，往往就會心雄發力衝線，好多時都會暈眩不支倒地，呢個時候就需要佢哋即時為選手急救喇。
交通安全隊總監洪為民都係年輕時加入制服團體。佢話自己細細個已經好想加入制服團隊，朋友邀請加入，至今已經做咗廿幾年。佢話喺交通安全隊要學習人群管理及交通情況，要考章升級，所以都要溫書先得。佢又話，喺交通安全隊可以學到「預見性」，即係見到前面有突發事件發生，就要預早諗定點樣去處理，如何控制車輛確保安全，不過佢就話自己揸車廿幾年，都冇特別事故發生喎。
李周美枝：教識自己有紀律
出席當日晚宴嘅仲有女童軍總會香港總監李周美枝，佢加入女童軍都有成四十年，認為制服團體可以教識自己要有紀律，每樣嘢都會諗清楚有乜嘢後果先至去做，喺日常生活都可以學以致用，而且仲可以去唔同地方見識，對人生觀好大幫助咁話。唔怪得唔少家長都希望子女加入制服團體喇。
卓妮