笑看天下:夜經濟被肺炎打沉

香港夜市死翹翹!老朽所居嘅上水,以前水貨客人山人海,成條街啲「藥房」燈火通明,晚上九點過後依然車如流水馬如龍,熱鬧到不得了!烈火暴行期間,偶爾有反水貨客嘅遊行示威,甚至縱火燒啲「唔順眼」嘅零售店舖,人流也未見靜止!之但係新冠肺炎來襲,市面繁華急轉直下,以前生意火旺嘅「藥房」,晚上七點已經拉閘!老朽把「藥房」兩字加上括號,皆因佢哋賣奶粉、化妝品等一定多過賣藥,這個大家都懂的!

最令老朽黯然神傷嘅係,大部分餐廳都提早收檔,晚上七點後已經唔做生意!老朽揸住架錢七,可以醫肚嘅只有麥記、一間牛雜麵店,幫襯開嘅粥麵店、小炒王已不做夜市,成個上水冷清到面目全非。讀本報「探射燈」,乃知這是普遍現象,「食肆葬疫境,娛場拍烏蠅」,原來區區冷清,香港告別不夜城!疫情蔓延下人人自危,旺角不旺,零售商店提早落閘,彌敦道晚上八時已烏燈黑火;銅鑼灣大型商場入黑後冷清;中環有酒吧直言生意急挫八成,一條街五間酒吧已執笠!以前係愈夜愈精彩,家陣就愈夜愈傷心!

內地近年不少一線城市如北京、上海、天津、濟南、杭州等,相繼推出「夜經濟」消費政策,「深夜食堂」是焦點。昔日揚州夜市,詩人筆下有句「夜市千燈照碧雲,高樓紅袖客紛紛」,依家喺疫情之下,鬼影都冇隻,不少大省市封關鎖門,正是:別後不知君遠近,觸目淒涼多少悶!睇怕「夜經濟」已被一疫打沉!

有人說,香港自反修例風暴後,油尖旺夜場已經常「熄燈」。咁又係噃,樓下汽油彈催淚彈橫飛,難道樓上仍可燈紅酒綠?依家行人個個戴住口罩,仲要隔開六米,仲有人斗膽跟陌生人有「親密接觸」?夜場不必差佬查牌都幾乎全線冚旗啦!政府派津貼畀旅行社、零售店、食店,有冇派畀「拍烏蠅」嘅夜場呢?