政情：有相為證：民政職員「在家工作」 區會主席牌仲未換
今屆區議會已運作逾兩個月，竟然有區議會仲未清除上屆嘅「遺物」，講緊嘅係寫上正副主席姓名嘅牌。
沙田區議員容溟舟尋日喺會議上話，區議會秘書處冇換到塊牌，明明上屆主席何厚祥已光榮引退，但塊牌仲喺度，形容係「陰魂不散」。佢仲提到現任正、副主席都冇得用辦公室，批評區議會秘書處提供嘅秘書服務係搞作對，又質疑點解政府咁耐都冇換塊牌，仲話「你唔好同我講話係因為疫情呀」。
話時話，今屆區議會開鑼冇耐就出現新冠肺炎，包括民政事務總署等政府部門因應疫情「在家工作」，令唔少區議會會議都取消埋添！政府部門喺今個禮拜復工，係咪真係因為疫情搞唔到換塊牌呢？真係要秘書處先知嘞！