政情：梁栢賢提醒同行 評疫政治化 引火自焚
新冠肺炎肆虐，確診個案續有上升，唔少醫學界人士都跳出嚟狠批政府防疫措施慢幾十拍，醫院管理局前行政總裁梁栢賢（PY）尋日打破沉默，喺Facebook（Fb）貼文提醒專業同行，如果批評太政治化，過咗界，最後可能會引火自焚。究竟PY係講緊邊啲專家呢？
指專家過分認叻易惹禍
好多人都將新冠肺炎疫情同○三年沙士相提並論，而當年爆發沙士，PY時任衞生防護中心總監。佢喺貼文中先禮後兵，指好多專業同行喺呢次抗疫護民行動中付出好多，係值得大家感謝同表揚，跟住就話專業歸專業，如果批評太政治化，過咗界，就會正如香港大學微生物學系講座教授袁國勇多年前警惕佢一樣：「過分認叻，就會惹出禍」，最後可能會引火自焚，同自己嘅政治期望適得其反。
其實PY喺舊年七月離開醫管局前，都話過咁多年公職生涯中，最難忘嘅係沙士，而佢喺退休後亦絕少出席公眾場合，只係間中喺Fb報吓行蹤，大多係風花雪月，好少月旦政事。
然而喺新冠肺炎確診個案愈嚟愈多，二月初公立醫院有部分醫護人員醞釀罷工，逼政府全面封關時，佢就喺Fb留言，話「抗疫的唯一出路是團結」。相隔一個月後，佢再喺Fb發聲，仲自爆袁國勇多年前嘅警惕，提醒啲專家唔好引火自焚，唔知班專家收唔收到呢？