政情：離任總商會 袁莎妮暫做全職老婆
喺香港總商會做咗八年行裁嘅袁莎妮（Shirley）去年五月已經提出請辭，究竟佢為咩辭職？又點解隔咗差唔多一年都仲未離任呢？Shirely就話自己係捱義氣喎。
為搵繼任人 捱義氣做到月底
Shirley喺接受總商會訪問時話，因為覺得自己係時候邁步向前，要重新出發，所以就提出請辭，不過就講明會做到去年年底先離任。佢最終都因為對總商會仲好有感情，想幫手物色一個適合嘅繼任人，所以就捱義氣做到今年三月底。
被問到任內最難忘嘅工作係咩，佢就話必然係說服咗政府實行兩級制利得稅，唔止直接幫到中小企營運，仲顯示咗商界係有能力靠數字同理據講服政府，證明商界唔係只識齋叫口號。辭職後有咩新方向？佢就話經歷咗廿年嘅政府政務工作同八年嘅總商會生涯，自己都算掌握咗商業、政策同政治嘅處理技巧，將來會繼續服務香港，因為香港係佢屋企，不過依家會停低休息一段時間，多啲陪吓屋企人，似乎係做全職老婆喇。